Sample Sidebar Module

This is a sample module published to the sidebar_top position, using the -sidebar module class suffix. There is also a sidebar_bottom position below the menu.

Sample Sidebar Module

This is a sample module published to the sidebar_bottom position, using the -sidebar module class suffix. There is also a sidebar_top position below the search.
Thalai din dan
  • Register

ISUA KRISTA KOHHRAN THALAI DIN DAN


- T. Lallawmawma

Kum 1971-a Isua Krista Kohhran din a nih khân Thalai hi din nghâl a ni mai lova. A chhan chu Kohhran din tirha a bul tantuten, an chhuahsan Kohhran tih dân lâk chu tul an tih loh piah lamah, Thalai din a nih chuan Solfa zai an sa ang a, (chu chu a hun laia thlarau mite do ber a ni si a, chuvângin, an duh tawh loha an chhuahsan Kohhran ang thova kalin, Thlarau a zalên lovang tih an hlauh vâng a ni.

Amaherawhchu, Kum 1975 a lo her chhuah chuan, Kohhran hruaitute zîngah Kohhran tihchak nân Thalai din duhna lian tak a lo awm a. February 1975-a Upa K. Lallûta Inah Assembly Executive Committee (AEC) an thukhawm a, Agenda pangngai pawh ni lo, Any Others Bussiness (AOB) atanga rawtna lo kalin, sawi pawh a hlawh hle a, hun rei tak an sawiho nghe nghe a ni.

An sawihonaah thenkhatte chuan, “Thalai din hi a la hun rih loh va, kan duh loh, kan chuahsan tawh hnu tih dân a ni a. Solfa-te nên an ti leh ang a, kan indang zo chuang lovang,” tih te, “Hun hmasa lamah Thalaite hi kan hnam Culture mila hlimna lo thleng rap bettuah an tang tawh a..... an din ve hi kan phal dâwn em ni le?” ti tein Thalai din tul an tih loh thu an sawi a. Chutih rualin, Thalai din tul nia hriate chuan, “Thalai kan din dân bul a dik phawt chuan, kal sual theihah kan ngai lo. Kan din leh Isua ke bulah; kan tluk leh Isua ke bulah; Van Lal nau anga tahna kalvari-ah tumah kan dang tawh chuang hlei ne’m. Thlarau Thianghlimin min awmpui phawt ang a,” tiin an chhang ve thung a. Hun rei tak an sawiho hnuin Thalai din chu an rel thlu ta a ni.

Chuti anga Thalai din a lo nih takah chuan an inkaihhruaina duang turin Upa H. Kawlhnuna (L) leh Upa A. Sangliana te ruat an ni a, a hming atan ‘Isua Krista Kohhran Thalai Pawl’ an ti nghe nghe. (Kum 1977 Assembly chuan ‘Pawl’ tih hi a paih a, tuna mi ang hian sawi a ni ta a ni) Isua Krista Kohhran Thalai Pawl chu Kum 1976 January ni 8-11-a Assembly chuan a pawmpui a. Thalai ding thar chu lo buaipuitu tur heti ang hian Body din nghal a ni a:

Convener: Upa. Thangkhuma, Chhingchhip
Acting Secretary: Evan. Lalhleia, Tirhkoh.
Members:
    1) Tv. Lalchamliana, Lengpui.
    2) Romawia, Tanhril.
    3) Laldingliana, Chhingchhip te.

January ni 12, 1976 (Thawhtanni)a Assembly Executive Committee thu khawm chuan ‘Thalai kaihhruaina’ buatsaih  tura AEC February 1975-in a ruat chu ennawnin mi pathum Upa K. Lalluta, Upa A. Sangliana leh Upa H. Kawlhnunate a ruat nawn leh a (Vide: Rorel No. 5). Inkaihhruaina dan hmasa ber chu heti ang hian buatsaih a lo ni ta a ni:

ISUA KRISTA KOHHRAN THALAI PAWL INKAIHHRUAINA

  1. A HMING: Isua Krista Kohhran Thalai Pawl a ni.
  2. MEMBERS: Isua Krista Kohhran zinga kum 13 atanga kum 40 inkarte chu an ni.
  3. HOTUTE: Chairman, Secretary, Asst. Secretary, Treasurer, Finance Secretary leh Committee Members 6 te.
  4. INKHAWMNA: Kohhran Hruaitute nen inbe remin kar khat chhunga hun khat rem an tih tlan chu hman tur.
  5. THURAWNTU: Kohhran Upa pahnih tal chu an zingah Thurawntu atan an dah tur a ni, chu chu Committee member ni sa an ni ang.
  6. INTHLANNA: Kum tin January thla chhungin Hotu thlanna an nei ang a, an mi thlante chu Headquarters-ah an report vat tur a ni.
  7. INKHAWMPUI: Bial, Division leh Assembly an nei ang a, Khawmpui hmingah chuan ‘Conference’ tih tur a ni.
  8. ZAIPAWL: Pathian chawimawi nan chuan a tha a, a pawimawh a, Intihsiakna: Pakhatna, Pahnihna awm chiah chuan hman loh tur a ni.
  9. INPEKNA: Kohhranin anmahnia tih tur leh beisei a neihte tihlawhtling tura inpeih reng an ni tur a ni.
  10. PAWL THIATNA: He Pawl hi Kohhran tana hnawk zawng leh Thlarau tana harsatna siamtu a nih chuan Isua Krista Kohhran Assembly-in engtik hunah pawh a thiatin a tidanglam thei ang.
  11. SUM DEHCHHUH THU: Hnathawh leh sum dehchhuah thuah Kohhran fuke tura beisei an ni a. An sum dehchhuah leh hmanna chu Audit (Endik) theihin an vawng tur a ni. An sum hmanna chu Kohhran hriatpuiin hman tur a ni.
  12. RAWNGBAWLTU RAWIH THU: Unit-in emaw Division-in emaw Rampumin emaw Rawngbawltu hlawh neiin a hranin an ruai mai tur a ni lo va, hun laklawha rawih tul riau an hriat pawhin an inhuamna leh tum dan fel takin Executive Committee-ah an thlen hmasa tur a ni. A hrang liaua mi rawih chu tih loh tur a ni.
  13. ROREL THUTAWPNA: Rampum huap emaw Dan nghet deuh tur chi reng rengah chuan Kohhranpui Assembly pass a nih loh chuan hman theih a ni lo.
  14. DAN TESEP: Tualchhung Kohhran tan leh Rawngbawlna chu anmahni inrelbawl ang a ni ang a. Hnathawh leh Thawhlawm siamte chu anmahni Tualchhung tan an rel thei ang.


1996 December Ni 10-a Assembly Mamit Hmar venga neih chuan (hemi kum hian Assembly vawi 2 neih a ni) Thalai Conference neih a phalsak a, a hmun atan Chhingchhip a ruat nghal bawk a. Assembly-in a phalsak angin Thalaite chuan General Conference hmasa ber chu Dt. 15 April, 1977-ah, Chhingchhip-ah neiin, Upa H. Thangkhuma’n a kaihruai a, rorel palai 58 kalin, Kum khat chhung atana hruaitu tur an thlang nghal a, chungte chu:

Leader              : Upa Thangkhuma, Chhingchhip
Asst. Leader      : Evan Lalhleia (Tirhkoh)
Secretary          : Tv. Lalchamliana, Lengpui
Asst. Secretary : Lalromawia, Tanhril
Treasurer          : Nl. Lalramliani, Republic
Fin. Secretary    : Tv. Lalkima, Sialsuk
te an ni.

Thalai Din Ni (Rising Day) chungchang:

Thalai Rising day hi Kohhran ram buai hma leh buai hnua Kohhran Thalai History hrang hrang atang chuan January ni 9 te, April ni 15 te leh October Ni __ ah te lawm a lo ni tawh thin a, chumi avang chuan Thalai din a nih dawna hma latu leh Hruaitu hmasa ber te la dam laia a dinni dik tak hriat chian law law hriatna a awm avangin Thalai Din ni zir chiang tur Committee din a ni a, hetih lai vek hian kan phir pui Asen lam pawhin kan hmalakna ang chiah hian hma an lo la ve mek bawk a ni.

Tichuan, anni nen kan thu hriat ang angte inpe tawnin, theih anga zau mi kan kawm kual a, hmun hrang hrangah kan zin bawk a, chu Committee chuan a finding result chu duh tawk mai lovin, zau zawka sawihona hun buatsaih nise tiin Central Thalai lamah rawtna a thlen ta a, rawtna ang chuan November ni 26, 2015 ah ‘Thalai Din ni chungchanga inrawn khawmna’ (Consultation Meeting on Rising Day)  buatsaih a ni a, hemi tum hian stenographer leh cameraman ruaiin, thusawitute thusawi zawng zawng record a ni a, chung zawng zawng chu khaikhawmin Central Thalai Extended Committee (CTEC) chuan January ni 9, 1966 chu awm a ti ber a, Kum 2016 General Conference-ah pawmpuina a dil angin 2016 General Conference chuan January ni 9, 1966 chu Thalai Din ni atan a pawm nghet ta a ni.

S5 Accordion Menu

Get In Touch

  • Near Pi Pangi Kawn
    Upper Republic, Aizawl - 796001
  • 0389-2322230
  • This email address is being protected from spambots. You need JavaScript enabled to view it.