Sample Sidebar Module

This is a sample module published to the sidebar_top position, using the -sidebar module class suffix. There is also a sidebar_bottom position below the menu.

Sample Sidebar Module

This is a sample module published to the sidebar_bottom position, using the -sidebar module class suffix. There is also a sidebar_top position below the search.
Finance Committee
  • Register

ISUA KRISTA KOHHRAN
General Headquarters, Aizawl, Mizoram

Isua Krista Kohhran din tûr thu hrilhlâwkna:

March ni 1, 1966 a lo her chhuah chuan Mizoram chu mahni rorêlna ni tûrin Pu Laldênga ho chuan Independent an puang a. Mizoram khawpui lian deuh deuhte MNF chuan lâk tumin an kap ta a. Aizâwl khawpui pawh lâk ngei tumin an inkâp nasa hle a. Police Outpost awmna ṭhenkhatte chu an la a, Lunglei khawpui sipai awmna pawh an la ta hial a. Chutianga buaina chuan Mizoram chu a tuam ta, India sorkâr pawh a awm mai mai bîk lo va, theih ang anga ami te (sipai) ṭanpui chu a hna lian ber a ni ta a ni. Thlawhtheihna hmangin Aizâwl khawpui chu a bei ta chiam a,  Aizâwl khawpui chu a kang ta hluah  hluah mai a. Mipui nunaute chu himna zawngin an tlân darh a, thisen tam tak a luang bawk a. India sipaite lah an lo luh theihna ang angin an lo lût a. Mipui pawi sawi lo tam tak thah an ni a, tam tak an man bawk a, Mizoramah ralmuanna a awm ta lo a ni. Mipui an ṭapin an rûm tak meuh meuh a, chhantu an ngai êm êm a ni. Mahni in pawh luah lum thei lovin khaw sawikhawm (Grouping) a ni ta zêl bawk nên, lungngaiin an rûm nasa êm êm a ni.
Chutih lai chuan Pathian Thlarau hriattîr Pi Nupuii hnenah, Pathian hnena sual thupha chawia ṭawngṭai a ṭul a ni tih thu a lo thleng a, Pu Saizahâwla inah ṭhutkhâwmna hmasa ber chu neih a ni ta a. Chumi-ah chuan ‘Isua zirtîr 70 tirh chhuah angin mi 70 in ṭhukhâwm tur a ni,’ tih angin an ṭhukhawm ta a. Chu an ṭhutkhâwma an thurelah chuan ṭawngṭai inkhâwm neih dân tur an sawiho ber a. Chutah chuan Zoram mipuiin Pathian hnena sual thupha chawia kan ṭawngṭai chuan Pathianin min ngaidam ang a, kan hrehawmna ata hi Lalpan min hruai chhuak leh ang tih chu an thupui ber a lo ni ta a ni.
Isaia bung 1:2-9 te, bung 1:18-22 te chu an thupui ber a ni a, chutianga an rel hnu chuan ‘Ṭawngṭai Inkhâwm’ chu an nei ta a. He tah hian Kohhran hrang hranga awm thlarau mite chu an fuankhâwm a, Pathianni tlaiah hun an hmang ta a. Aizâwlah chuan  Sikulpui, ‘Government Boys Middle School,’ an tihah hian a ni a.  Thlarau Thianghlim pawhin a awmpuiin a pâwl hle a, an hlimin an lâm nasa hle a ni. Thingtlâng lamah an feh chhuak ta hlawm a, khawtin tih theihah ṭawngṭai inkhawm chu hman a ni ta a. Rambuai kârah, sipai hlauhna kârah Pathian hnathawh chu a lo lang ta zel a,  Mizoram chu hlimnain a tuam chhuak ta a, thlarau thianghlim hnathawh a lang nasa hle.
 Chutianga ṭawngṭai inkhâwm neih a nih a, Kohhran pâwl sawi lova thlarau mite an kal muah muah lai chuan Pathianin hun hla tak aṭanga Kohhran thar lo piang tur a lo hmuh tîr chu a takin a lo lang dawn ta a ni. Kohhran lo piang tur hi Pu Patlaia, Tlangnuam hnênah kum 1936 January ni 14 khân, ‘Kum 1971-ah in ramah Isua Krista Kohhran a lo piang ang,’ tiin  hriattîr a ni a; 1949 September ni 22 khân Pastor Kâwlthawma, Mamit hnênah Isua Krista Kohhran a lo din tur thu, ‘Kohhran lian ber a la ni ang,’ tiin hriattîr a ni bawk a. Tin, kum 1966-ah Pi Nupuii,  Reiek hnênah hriattir a ni a; kum 1967-ah Upa Chhûnga, W. Phaileng hnênah Pathianin, ‘Kohhran thar a piang ang,’ tiin a hriattîr bawk a, hêng bâkah pawh hian a dang tam tak a awm a ni. Kohhran thar lo pian tûr thu Pathianin a hriattîr zawng zawngte sawi vek sên a ni lo.
 Chutih lai chuan ṭawngṭai inkhâwm hruaitute neiin an awm a, chungte chu:- Pu Lalhnûna, Chaltlâng te; Pu Raltâwna, Durtlâng te; Pu Rokima, Aizâwl te; Pu Lalhluna, Mission Vêng te; Pi Nupui, Reiek te an ni (sawi hmaih an awm thei bawk awm  e).


Isua Krista Kohhran a ding ta:
Hêng hruaitute hian hun eng emaw chen chu an hruai a, 1971 April 4-6 hmangin Thlarau mite Aizâwlah an ko khâwm a. April 4 hi Bethel ni a ni a. Chaltlânga Bethel lungphunna hmunah hun hman a ni a, he hunah hian thlarau mite an kal ṭha hle a. Pu Thangkhûma B.A., S. Vanlaiphaiin a kaihruai a, Pi Nupuii’n hun a hmang thung a. Hemi ṭum aṭang hian  mahni awmna hmun apiangah Bethel hi hman tawh tûr a ni tih chu pawm a ni a, tun thlengin mahni khua leh kohhranah hman a lo ni ta a ni (A hmain Chaltlangah Bethel lungphunnaah a huhovin hman ṭhin a ni). April ni 5 niin Pachhunga College, tuna Pachhunga University College (PUC) an tih tâkah hian hun hman a ni a, an zai nileng a, an hlim hle a, an lâm nileng a ni ber mai. April 6 niin Zodin Cinema Hall-ah hman a ni leh a, hetah hian rorêlna an nei a, zawlnei ṭhenkhatin kohhran din a hun tawh an ti a, a ṭhenin a la hun lo an ti bawk a, an thu a inhmu ta lo va. Kohhran din a hun tawh ti zawngte chu Pu K. Lallûta in, Vênghluiah tlai lam dâr 3:00pm-ah an kalkhâwm ta a, hetiang hian rorêl a ni ta a ni.

THLARAU MITE ṬHUTKHAWMNA

A hmun : Pu K. Lalluta In, Vênghlui
A hun   : 6th April 1971, 3:00.pm.

RORELTE :

  1. Zawlnei ṭhenkhatten Kohhran din a hun lo ti mahse ṭhenkhatin a hun an ti a, hêng khuaah te hian a ding tawh si a, mahni ṭheuh pawha an din ngam si avângin din mai ni se kan ti a, Headquarters atân Aizâwl ni rawh se kan ti.

KOHHRAN DIN TAWHNATE:

  1. Fârkâwn
  2. Vaphai
  3. Mamit
  4. Dulte
  5. W. Phaileng
  6. Lêngpui
  7. Reiek
  8. Chhingchhîp
  9. Vênghlui
  10. Luangmual
  11. Durtlâng
  12. Hnahthial
Isuan zirtir sawmpahnih a thlang ang chiahin khaw sawmpahnihah a rualin a ding ṭhap a ni.
  1. General Secretary atân Pu K. Lallûta, Vênghlui; Asst. Secretary atân Pu Nghakliana,  Vênghlui. Puipa dangte thlang rih lo mai ila kan ti.
  2. Kohhran chanchin inhrilh fo a ṭul avângin tualchhûngin sum kan neih ṭheuh aṭangin 1/10 (sawma pakhat)Headquarters-ah chhun ni se, 9/10 (sawma pakua)chu tualchhûng unit enkawl nân hman ni se, lehkhathawn vêl nân hman ni se kan ti.
  3. Baptisma leh Lalpa zanriah chu mahni tualchhûngah intodelh ṭheuh ni mai se, thil ṭul awm apiang chu Secretary ten lo bawhzui se kan ti a, hlim takin kan ṭin ta a ni.
He Thalarau mite ṭhutkhawmnaah hian R. Saptâwna, Chairman leh K.Lallûta, Secretary ten hming an sign a ni.
Chutianga Thlarau mite inhmukhawmin kohhran din an tihtlûk tâkah chuan October ni 5, 1971 khân Kohhran thar Committee chuan meeting an nei ta a, hetiang hian an record a:-

KOHHRAN THAR COMMITTEE

A hmun : Pu K.Lalluta In, Vênghlui
A hun : 5th October, 1971 dâr 10:30 am.
Chairman : Pu Thangkhûma
Hun hmangtu : Pi Nupuii (Ṭawngṭaina a nei)
Lehkhabu (Constitution) din hualin “Lalpa hmangaihtute u, in lawm hla rawn sa r’u” tih kan sa.

THU REL TE:
  1. Kohhran thar hming atân hian eng nge kan sak dâwn? Thlarau lama hmutu chuan ‘Isua Krista Pathian Nung Kohhran’tih hi a ni a; mahse Isua Krista chu Pathian nung a nih tlat avângin a hmu phir mai niin a lang a, chuvângin Kohhran hming atân chuan, ‘ISUA KRISTA KOHHRAN’ tih a ni ta (Isua Krista Kohhran chu Pathian nung Kohhran a ni).
  2. Unit tinin Pathian biak nân Biakin an sak nghal mai hi a rem lohna kan hre lo.
  3. Sunday School hi unit ṭhenkhatin kan mamawh hle a, tun atân chuan inkaihhruaina, zirlai lam buatsaihnate kan la neih bawk loh avângin ṭha an tih ang anga lo inkaihhruai mai ni se kan ti. Nakum lam atân erawh chuan Headquarters lamin zir tûrte rawn buatsaih thei se kan ti.
  4. Isua Krista Kohhran Khâwmpui (Intawhkhâwm)neih ṭul leh ṭul loh thu kan sawi hova, a ṭulin kan hria a, a hmun atân chuan Chhingchhîpin an rawn dil angin kan remti a, thlenkim ni atân 16thMarch 1972 ni se kan ti.
  5. Constitution buatsaih chungchângah sawihona kan nei a, engpawh ni se inkaihhruaina kan siam chin hi thlarau dân daltu a ni thei lova, chuvângin Constitution hian kan rilru la buai lo sela, a ṭulnate a awm chuan hman mai ni sela, a ṭul ang anga la siam ṭhat zêl ni se kan ti.
  6. Headquarters chelh tûr hian mi inpe zo, ram thlir thiam leh hmu, ram chuh tûr kan duh tih thu a lo lût a. Ngun taka kan sawiho hnuin tuna kan hotu dinglaite hian hna an ngah dân ang leh a ṭul dânin a rawn hril zêlin, mi inpete nên lo inbuatsaih chho zel rawh se.
  7. Hemi Kohhran chhûnga serh leh sang dân khawih kan mamawh hle a, unit tinin thlarau lam aṭanga khawih thei tur nia an hriat ten mumal takin lo inbuatsaih rih mai rawh se.
  8. Thuhriltu (Evangelist)kan mamawh hle nia hriatna kan nei a, harsatna tam tak kâra thlarau tirh mi chhawmdâwl nân Kohhran tinin ṭhahnemngaih kan chhuah ṭheuh a pawimawh hle niin kan hria.
He Kohhran thar Committee-ah hian Thangkhuma, Chairman leh K. Lalluta, Secretary ten hming an sign a ni.

S5 Accordion Menu

Get In Touch

  • Near Pi Pangi Kawn
    Upper Republic, Aizawl - 796001
  • 0389-2322230
  • This email address is being protected from spambots. You need JavaScript enabled to view it.